要聞港聞
馬鞍山:恒安邨民搭綠巴難
有市民於早上繁忙時間經常遇上客滿而無法登車。
「成日都係之前啲站就坐爆晒,啲小巴嚟到呢度就飛站,咁不如索性取消咗佢,或者出告示話畀人知繁忙時間要行去總站上車啦!」居於馬鞍山恒安邨的李先生每早習慣乘搭26號專線小巴前往大埔上班,惟經常因客滿而未能登車,近日又再遇同樣情況,結果要在街上呆等近一小時,「冇錯佢係幾分鐘就有一班,但係上唔到車咪又係得個望字。」
運輸署發言人證實,過去一年共接獲八宗涉事路線上午繁忙時間班次不足的投訴,接獲轉介後亦有派員在有關分站實地視察,發現班次符合規定,雖有部分乘客未能即時登車,但均可登上隨後班次。
發言人補充,已要求營辦商繼續留意沿途乘客需求及靈活調配班次,以作疏導,亦有一直與其跟進各投訴個案,並會繼續密切監察有關運作及服務水平。
第一手消息請下載on.cc東網iPhone/iPad/Android/Windows Phone Apps