一手交錢，一手交貨，係正常嘅商業交易方式，古今中外都唔例外。不過咁，如果你購買機票，咁就唔同講法喇，隨時畀咗錢都冇貨交，事關航空公司超賣機票已經成為家常便飯，旅客只能任人擺布嘅咋。呢，「東方報業民意調查」顯示，大部分受訪者狠批航空公司走法律罅，嚴重損害消費者權益，要求當局堵塞漏洞，加強監管。
提到航空公司超賣機票，國泰可以講係典型中嘅典型。本報最近不斷接到讀者投訴，次次都同國泰有關。有人飛印尼，因為航班超賣而延誤七粒鐘；有留學英國嘅學生暑假回港，就算預早辦理網上登機手續，亦因為超賣而焗住搭下一班機。至於買咗商務機位被迫「降呢」至經濟艙，買咗經濟艙被迫搭下一班機等等，幾乎日日都有，簡直係鑊鑊新鮮鑊鑊甘。
最離譜嘅係，國泰自己管理混亂，安排失當，令旅客大失預算，冇道歉賠償不特止，反而大條道理，一句「業界普遍做法」就關人個關。國泰店大欺客，消費者唔嬲就假，上述民調顯示，多數受訪者直指航空公司走法律罅賺到盡，侵害消費者權益；同時亦有唔少人認為法例欠阻嚇力，當局對亂象無動於衷，損害香港形象。
冇錯嘞，國泰之所以愈來愈離譜，除咗因為內部管理混亂而令服務插水，亦因為法例存在灰色地帶，令航空公司有機可乘。正如法律界人士話齋，乘客真金白銀購買機票，等於同航空公司達成協議，到上機時航空公司至話冇機位，可能已觸犯新修訂嘅《商品說明條例》，最蠱惑嘅係大部分機票有免責聲明，加上旅客好難證明延誤造成嘅經濟損失，搞到投訴無門，怨聲載道。
睇吓投訴數字，就知問題有幾嚴重。今年上半年消委會收到關於機票嘅投訴比去年同期急升四成，主要就係涉及機票超賣；而海關近兩年亦接獲十二宗相關投訴，但從未檢控過。唔怪得好多受訪者批評當局有法不執，變相縱容。
話時話，航空公司尤其係國泰問題多多，投訴不斷，又點止機票超賣咁簡單吖。航班延誤甚至取消、轉機安排不當、乘客淪為人球、機上收費爭拗、機艙冒煙急降……五花八門，無奇不有。冇計喇，機管局及民航處等監管部門本身烏煙瘴氣，亂象叢生，航空公司無王管咯喎，仲唔乘機博懵咩。近年國泰全球排名固然急跌，香港國際機場排名亦唔好得幾多，航空樞紐地位睇怕遲早不保。
正所謂，一滴水看穿世界，航空業不思進取，競爭力不進則退，正如成個香港一樣，沉迷政治鬥爭，想唔沉淪都幾難！