「貪曾」前特首曾蔭權爵士被揭發「貪盡海陸空、歎盡省港澳」後被廉政公署調查，猶如過街老鼠，幾次想「搬竇」，都係搞到累街坊收場。貪曾被揭發計劃退休之後，平租「深圳禮賓府」豪宅，但最後都被迫放棄，業主黃楚標事後大呻個單位租唔出。到最近貪曾又想租住元朗葡萄園，點知又係嚇親業主丁志威，怕大批傳媒追訪會影響鄰居，最終寧願自用都唔租畀貪曾。貪曾租屋租到邊都係搞到業主雞毛鴨血，唔肯租畀佢，簡直係神憎鬼厭，就算有朝一日畀佢租到地方都可能住唔長，分分鐘瞓街都有之。
