政情：李文斌要博青年信任
近年掀起一陣健康生活風氣，尋日全民運動日，香港新活力青年智庫主席李文斌（Edmond）都喺彩虹道運動場舉辦三人籃球賽，有約三十支隊伍報名參加，佢希望繼續舉辦多啲同類型活動，可以推廣做運動嘅好處。不過，Edmond坦言，做地區工作最困難係要令人相信佢哋冇政治目的，為咗證明畀年輕人睇，佢哋會一直持續支持青年工作。
Edmond話，佢小學時並唔係一個運動健將，反而係辯論隊成員，又話細個好專注讀書，小學嗰幾年均考獲頭五名，其後到外國升讀中學後亦甚少運動。不過，隨着佢為人父親，先發現運動非常重要，於是開始培養跑步習慣，仲跑馬拉松添。至於會長孫燕華細個亦係書蟲，但做咗會長之後喺耳濡目染下，近期都開始跑步同游水喇。