政府高層上月大地震，原民政事務局局長曾德成及原公務員事務局局長鄧國威名為離職，實為「炒魷」，震動整個政圈。其中鄧國威離任後尋日首度接受電台訪問，自爆本擬工作至一七年，只係世事發生得好快，請辭決定亦來得好急，同事亦未能預計。講離職原因，佢話係「預計不到嘅家庭理由」，但又話唔係家人出問題，理由牽強，難以令人信服佢唔係被「炒魷」。不過，佢聲稱已「盡咗力」，亦冇倒米，三年來工作問心無愧。
鄧國威在任三年間，於處理公務員薪酬及延長退休年齡等問題上，被指態度冷漠，與多個公務員團體關係惡劣。對於被指因工作不力而「被炒」，佢話離職係因為出現「預計不到嘅家庭理由」，但又話唔係某一位家人出現問題，只係想「多啲時間」陪伴所有家人，強調家庭平安，自己身體亦冇問題喎。何解陪伴家人係「預計不到嘅家庭理由」呢？
至於幾時開始考慮提早退休、特首有咩反應時，鄧國威就話「唔記得考慮咗幾耐」，兼指事情已經過去，唔想「講得太多」，只強調自己確實有提出請辭，而特首亦關心公務員士氣。喺政府工作咗三十多年，佢話「執嘢」都要時間，但早前已經「執好」，待稍後運送回家，退休後會多旅行和做義工等充實生活。一般局長任期五年，現時提早退休，佢話心態上需要調整，指會規劃一吓退休生活。