政情：選前失調 民記內訌

委任制議員「轉直」爭位

區議會選舉十一月二十二日舉行，由於下屆區議會取消委任制，現任嘅委任議員都要諗定後路，唯一方法就係轉戰直選，亦因此加劇地區上嘅競爭，就算屬同一黨派亦難免有衝突。

好似本身係民記嘅西貢區議會副主席陳國旗，聽聞佢因為年紀問題，打算做埋今屆就退下火線，將富藍選區議席交畀曾經喺○三年區選落敗嘅西貢委任區議員陳博智，自己就專心打理私人生意。

不過，據聞原本陳國旗諗住交棒畀民記社區總幹事葉子弘，改由陳博智頂上係後來嘅決定。我哋分別問過民記同葉子弘，但就出現咗兩個唔同版本故事，民記話本身喺大專教書嘅葉子弘，因為忙於教學工作而放棄區選；但葉子弘就話民記突然抽起佢，都唔清楚發生咩事，對呢個安排非常失望，最後決定退黨。

有民記中人透露，經過一段時間嘅觀察，發現葉子弘無論係個人質素同時間分配都滿足唔到黨嘅要求，所以決定換人。不過，適逢區議會將會取消委任制，民記嘅安排難免令人猜想此舉係為確保黨內委任議員保住議席。

「與鍾樹根不歡而散」

此外，現時喺東區區議會下耀東選區服務嘅民記前黨員王詩展，早前就喺社交網站張貼有骨文章，鄭重聲明自己喺去年五月已經退出民記，再冇蛇齋餅糉可以派，又暗示如果有人想要蛇齋餅糉，可以向當區區議員許嘉灝查詢。佢仲將自己嘅黨員證剪爛，上載埋退黨信，睇嚟真係幾嬲咁喎。

我哋問過王詩展，佢話同身兼立法會議員嘅東區區議員鍾樹根不歡而散。咁點解咁不歡？樹根就話，王詩展年幾前跟許嘉灝做地區工作，但就唔多夾，期間試過有勞資糾紛，仲搞到去咗勞工處，最後佢哋講明唔支持王詩展出選，王咪自己退黨囉。不過，王詩展依家喺番許嘉灝嗰區做嘢，似乎係想參選爭奪議席，睇嚟新仇舊恨一觸即發喇！