中環出更：民政局網頁雙局長坐鎮
原民政事務局局長曾德成被「炒魷」已近兩星期，但卓妮發現民政事務局網站首頁驚現兩名局長，網頁正中間可見新任局長劉江華嘅相，而左邊欄目中卻有一個標示寫着「曾德成局長隨筆」，按下標示後，分頁載有曾德成多年來撰寫嘅網誌。曾德成已經喺上月離任，驟眼一睇隨時誤以為民政事務局有兩名局長。
民政事務局發言人解釋，早前諗過點樣處理以前曾德成嘅隨筆，得知有市民仲想睇曾德成嘅舊網誌，所以喺左邊欄目保留咗個標示，以便市民查閱，至於劉江華就暫時未有計劃撰寫網誌喇。其實為免混淆，局方為何不改作「曾德成前局長隨筆」呢？或是另有原因？
劉江華落區打波Ｏ晒嘴
講起劉江華，佢尋日就趁康文署舉辦全民運動日，到咗香港公園視察，仲同一班中年婦女跳健體操，又玩毛巾操，全程又扭又揈。而戲肉就係佢同傷健乒乓球運動員合作雙打，佢喺一分鐘比賽，抽咗幾吓板，仲打到「Ｏ」晒嘴，期間有贏有輸，但最後以一分飲恨。
卓妮