中環出更：繪出歸屬感 劉秀成力撐
經歷早幾年德育及國民教育科（國教）風波及去年佔領行動後，剛發生嘅港大學生會佔領校委會會議及禁錮校委事件，再喚起各界關注青年問題，但係咪再強推國教或辦兩地交流團就可以解決問題呢？藝育菁英主席方黃吉雯最近就搞咗個以「家」為主題嘅青少年繪畫比賽，作為成員嘅立法會前議員劉秀成（Patrick）就認為，繪畫有助青年人認識香港及增加歸屬感，好過強推國教喎。
Patrick向來都愛好寫生，卸任議員後亦都有教吓小朋友繪畫，今次佢係擔任繪畫比賽評判。佢話比賽以「家」為主題，其中一環係要參加比賽嘅小朋友同青年人喺所住嘅地區揀一個有代表性嘅景點作為畫作內容。佢覺得繪畫都係一個好好嘅方式，可以讓青年人對自己所屬地區多啲了解同認識，增加歸屬感。被問到繪畫係咪好過政府強推國教，佢就諗都唔諗即刻話︰「梗係啦！」仲認為應該搞多啲呢類活動添。
自嘲手鈍 莊偉茵唔學畫
卓妮同場仲見到立法會議員廖長江及中電企業發展總裁莊偉茵（Quince），Quince仲同丈夫黃楚權一齊現身添。Quince話自己唔識繪畫，但都鍾意睇畫，有時候行街經過見到好靚嘅畫，佢都會停低用手機影低，得閒攞出嚟睇吓。咁點解唔學吓繪畫？Quince話都知道方黃吉雯有搞繪畫班，仲留咗個位畀佢添，但佢自嘲得把口叻，但隻手就好鈍，所以都係學唱歌好啲喇。
卓妮