話說有隻大猩猩，某日運氣特別好，一路行一路執到食物，最後居然為咗執一粒芝麻，丟棄手上嘅西瓜，呢個就係成語檢了芝麻掉了西瓜嘅典故。大家可能會話，笑話啫，猩猩唔會蠢成咁啩？嗱，世事無奇不有，真係有人咁蠢，香港郵政咪就係現實中嘅大猩猩囉。
係咁嘅，香港郵政對本地郵件郵資不足問題一直闊佬懶理，直到審計署介入調查，郵政至急急補鑊，突然轉性加強抽檢郵件，每日發現欠資嘅郵件由以往約五百件激增近三倍至約一千九百件。本來呢，抽檢郵件係郵政官僚嘅本分，自我修正乃應有之義，問題係香港郵政因此每月需要額外花費百萬元補貼員工加班，而每月成功追回嘅欠資只有區區數萬元，妹仔大過主人婆，你話係咪檢了芝麻、掉了西瓜吖？
立法會議員就批評得啱嘞，郵件郵資不足係寄件人嘅責任，無理由以公帑補貼，何況追回嘅欠款遠遠少過額外增加嘅公帑，香港郵政得不償失，簡直係笨招。其實計功夫茶話齋，郵政官僚用百萬元成本追討幾萬元郵資，何止係笨招，簡直就係荒謬，明明屬於正常嘅工作，居然動用巨額公帑補貼員工OT，如果個個部門都係咁，港府咪好快破產？所以話，香港郵政年年虧蝕，唔係無原因o架，花費公帑好似倒水咁，多多錢都唔夠佢哋敗家喇。不如咁吖，香港郵政以後改名叫「敗家郵政」，咁咪可以名正言順浪費公帑囉，笨！
話時話，郵政官僚慷納稅人之慨濫發超時補水，都唔係第一次咯。本報早前踢爆二十幾名郵政員工集體蛇王，日日整色整水拖到八點收工，然後呈報超時工作呃補水，而管理層居然照批，簡直荒天下之大謬。試諗吓，香港郵政經營不善，生意慘淡，工作量大減，理論上應該人手過剩至係，但事實係郵政員工申領超時補水幾乎係眾部門之冠，每年達二億元之多，話無蠱惑都無人信喇。
最令人反感嘅係，香港郵政唔止年年虧損，而且頻頻「失信於民」，淨係舊年就遺失本地及海外郵件七千三百幾件，賠償金額超過二百萬元，甚至試過八日內三次遺失郵袋，簡直匪夷所思。補鑊抽檢郵資不足唔見一筆，濫發超時補水唔見一筆，遺失郵件又賠一筆，大家話喇，香港郵政點可能唔成為敗家仔吖？
正所謂，物必先腐而後蟲生。郵政官僚又蠢又懶，內部爛到乜嘢程度，畫公仔唔使畫出腸喇，奇就奇在港府居然坐視不理，放任自流，唔通港產官僚仲蠢過因小失大嘅大猩猩？