政情：百變偲嫣 嚇呆本土派
正義聯盟同撐警大聯盟尋日發起「撐警一周年勝利大遊行」，引來熱血公民拉隊打對台，雙方一度爆發衝突。正義聯盟召集人李偲嫣再次出動「校服Look」，身穿格仔校服裙喺台上載歌載舞，又以全新「唐三藏Look」演出話劇《黃屍毒》，串爆前壹傳媒集團主席黎智英（肥佬黎）利用「毒蘋果」播劇毒。李偲嫣騎呢裝扮一出，熱血公民成員莫不愕然兼冇眼睇，大叫口號「人形豬」、「回水」贈興。
約五十名撐警人士由遮打花園遊行至灣仔警察總部，然後再折返原地。回程時撞正熱血公民同本土力量成員，大家互不相讓，結果發生衝突，後來警方以涉嫌襲警拘捕一名戴口罩嘅本土派人士返警署協助調查。
扮完學生妹又扮唐僧
平靜過後，近期做戲做上癮嘅李偲嫣又再以騎呢造型登台演出。先係着上格仔校服扮學生「豬妹」登場，同場角色有戴住面具嘅肥佬黎、民主阿婆同瞓街卿等等，話收黑金可以有車有樓兼月搵幾萬蚊，仲有成班大媽伴舞添！話劇做完，李偲嫣仲未夠喉，同場加映頭條劇場，諷刺電台時事節目，以新造型身穿袈裟扮唐三藏，話「傷港電台」同「毒蘋果」，仲毒過「貞子」，叫孫悟空伏妖喎！
一班熱血公民同本土派本來好激動，一睇到個劇場都即刻呆晒，唔知好嬲定好笑。