政情：中環出更：企業支持 在職婦女撐起半邊天
香港職業女性多，如何事業家庭兩兼顧，真係費煞思量。尋日紫荊青年商會舉辦一個頒獎禮，表揚在職婦女及支持女性僱員嘅企業。婦女事務委員會主席劉靳麗娟及家庭議會主席石丹理都有到場。育有一對子女嘅石丹理話，當太太上班時，佢必定將工作帶番屋企處理，方便睇住子女，令太太無後顧之憂。
石丹理話，在職婦女能否兼願事業與家庭，實有賴夫婦間嘅協調。本身係教授嘅石丹理，太太係一名社工，雖然屋企有外傭幫手打理家務，不過佢同太太堅持唔將教導子女嘅工作假手他人，亦會避免父母同時缺席。所以佢寧願辛苦啲，每當太太上班嘅時候，佢將部分學校嘅工作帶番屋企，一邊改卷一邊教子女做功課。
留意女員工需要 提升士氣
劉靳麗娟話，在職婦女所面對嘅困難唔少，但係只要動吓腦筋，實有解決嘅方法，例如安排彈性上班時間，又或者設置哺乳室。至於劉太任教嘅中學容許教職員每星期有半日時間處理私人事務。事業與家庭並重嘅劉太坦言，同家人相處嘅時間唔夠工作時間長，所以好珍惜假日時間。早前佢就趁暑假同家人去日本玩咗十日，仲玩得好盡興。
舉辦今次活動嘅紫荊青年商會會長魏文珊（Mandy）雖然未婚，不過相當理解在職婦女要兼顧家庭及工作嘅處境。Mandy就話，僱主只要細心留意女性員工嘅需要，令到每位在職婦女成為好媽媽嘅話，員工嘅士氣不但會提升，仲有助社會和諧咁話。
卓妮