以「金玉其外，敗絮其中」形容香港，有人可能會認為太過誇張，但如果話「表面光鮮，內裏污糟」，相信多數市民都會認同。冇錯嘞，香港話就話係國際先進都會，其實藏污納垢，衞生黑點遍布各區，講起真係醜怪。
呢，早前有政黨檢視各區衞生情況，發現七十六處衞生黑點，港島十七個、九龍二十六個、新界三十三個，表面上比前兩年少咗，實際上整體衞生情況依然相當惡劣。港府可能知衰啩，隨即宣布舉行新一輪「全城清潔大行動」，而且例牌由政務司司長親自掛帥添。可惜吖，呢啲清潔騷往往只有三分鐘熱度，姿勢多過實際，究竟可以解決乜嘢問題，真係要打一個大大嘅問號。
唔係潑冷水，本報記者日前巡查過多個衞生黑點，只見垃圾遍地，環境惡劣，簡直不堪入目。喺深水埗，有後巷長期堆積食物殘渣及建築廢料，甚至有一條近二十米長嘅垃圾龍；喺佐敦，有後巷渠口長期淤塞，仲有人隨地小便添；喺北角，有後巷唔止成為垃圾及紙皮陣，仲有食肆清洗器皿食具，搞到污水長流，臭氣熏天。最諷刺嘅係，呢啲地方早喺○三年曾蔭權爵士擔任清潔大隊長時已被列為衞生黑點，點知十幾年後嘅今日依然係黑點，依然烏煙瘴氣，你話係咪嘥氣吖。
話時話，港人對清潔大行動早就麻木。○三年沙士、○九年豬流感、一三年沙士十周年，港府都啟動全城清潔，結果係點，大家有眼見喇。當年民政事務總署係威係勢推出「社區清潔指數」，話要監控十八區嘅垃圾量及食肆一帶行人路嘅清潔程度喎，點知到○八年就再無公布指數；而食環署亦曾喺各區嘅衞生黑點裝設閉路電視，監控衞生情況，但○七年起已陸續移除。正如立法會議員話齋，港府每次清潔行動都難以持久，爭取政績多過解決衞生問題，根本就係政治騷；何況清洗街道並非治本之策，必須加強巡查及檢控，至可以洗脫衞生黑點。
咁又係吖，港產官僚一向得把口，講就天下無敵，做就有心無力，清潔行動雷大雨小，大鑼大鼓過後就關人個關，唔怪得愈清潔愈污糟喇。人要日日沖涼，地方同樣要經常清潔，港府平時唔燒香，臨急抱佛腳，香港想唔烏煙瘴氣都幾難。當年沙士之所以害到香港雞毛鴨血，其中一個主要原因就係各區衞生環境惡劣，成為病毒溫床，家陣萬一再爆發疫症，後果同樣不堪設想。
毛伯伯講過，掃帚不到，灰塵照例不會自己跑掉。清潔香港必須持之以恒，唔可以淨係靠做騷，否則遲早垃圾圍城嘅咋！