政府尋日公布多個委員會嘅任命，多個熟悉嘅名字都出現喺唔同嘅委員會，其中最受矚目嘅係博彩及獎券事務委員會，委任從來冇做過委員嘅中華總商會常務會董方文雄做新主席，接替做咗六年主席嘅容永祺。
而啱啱競逐全國青聯副主席失利嘅香港青聯前主席霍啟剛亦獲委任為委員。
今次博彩及獎券事務委員會共有六名委員卸任，包括香港青聯前主席葉振都。當年啟剛正係接替葉振都做青聯主席，未知今次啟剛獲委任，係咪同樣接替葉振都個位呢？
早幾日全國青聯改選，有份競逐副主席嘅啟剛輸咗畀菁英會創會主席施榮忻，過咗幾日啟剛就再獲委任做公職，可見佢的確仲好後生，可以等多幾年，只要努力嘅話，應該大把機會嘅。
政府另委任香港肝臟移植協康會副會長葉永堂為醫管局新成員、資深會計師余葉嘉莉為旅遊發展局成員。