已被踢出民主黨（白鴿黨）嘅立法會前議員黃成智與遲早會被踢出黨嘅立法局前議員狄志遠，將會籌組一個溫和泛民新政黨，搶攻年底區議會及明年立法會選舉。
黃成智尋日爆料稱，新政黨嘅核心成員仲有兩名前白鴿黨員，包括葵青區議會前主席周奕希及白鴿黨前總幹事陳家偉，另有三名地區白鴿黨員打算投靠該陣營。陳家偉四年前被踢爆於香檳大廈召妓，其後辭去總幹事職務兼退黨。
黃成智曾經講過唔會向民主黨挖角，但係依家就有多名前黨友轉投其陣營。狄志遠解釋，佢哋並冇主動拉攏白鴿黨員，但亦唔會拒絕主動搵上門嘅人，又指除咗白鴿黨黨員，仲有其他非民主黨現任區議員向佢哋投石問路，查詢「過檔」情況。
黃成智強調，佢哋主打「第三條路」，即唔想支持激進泛民，但亦唔會轉投建制派懷抱，強調只有透過選舉先至可以展示政治實力，惟新政黨未必趕及年底區選前成立，屆時或會用其他名義出選。