部門鬥卸責 寮屋拖足13年未拆
空置寮屋交還政府部門，竟「待拆」十三年仍原封不動！大圍有寮屋位於村落出入口，原住戶早於○二年已遷出，房屋署多年來一直未有清拆，全港寮屋交由地政總署接手後更石沉大海。有村民指涉事寮屋鐵架已嚴重銹蝕，擔心隨時倒塌殃及村民。地政署接獲查詢後，急急承諾將落實清拆「補鑊」，遭立法會議員狠批部門並無妥善跟進，令以民為本施政淪為空談。
「嗰戶人十幾年前已經搬走咗，間屋之後就一路丟空，房署好多年前應承話會拆，點知到依家都仲係冇聲冇氣。」大圍村居民李先生指出，空置寮屋坐落於其中一條出入通道，平日有不少村民會取道經過，擔心銹蝕寮屋經不起風吹雨打將有倒塌之虞，「條路可以通去積信街，好多街坊都會喺度出入，間屋丟空咁耐仲爛成咁，分分鐘冧落嚟砸死人！」
房署：唔夠資源 冇即時危險
李又指，據悉涉事寮屋土地業權早已交還政府，多番投訴仍未獲跟進，「笪地都畀返政府，又冇人住，要拆都冇人反對啦。同埋呢度行去火車站都係十分鐘，唔係咩隔涉地方，但係問房署，啲職員都話唔夠資源同冇即時危險，總之就推三推四。」
記者曾實地了解，發現涉事寮屋大門及牆壁皆被房署以油漆噴上「此屋待拆」告示，冷氣機位置正正處於行人通道上方，簷篷鐵架則已銹迹斑斑，外牆亦有另一鐵架已告剝離。差餉物業估價署發言人證實，原有佔用人於○二年中遷出後已將土地交還政府，亦已刪除有關差餉估價。
房屋署發言人以口頭回應事件時，僅稱○六年四月已將寮屋管制及清拆職務移交地政總署。
地署：將按程序進行清拆
地政總署發言人最初口頭回覆稱，視察時發現涉事寮屋漆有房屋署告示，需時間了解事件，其後再以書面回覆時，則指涉事構築物並非登記寮屋，今年六月及七月到場視察時，發現該屋位於未批租官地，多次視察均未有發現有人佔用，沙田地政處將按程序採取適當的土地管制行動，以進行清拆。
「對市民嚟講政府就淨係得一個，唔會清楚啲嘢幾時轉咗畀第二個部門，唔可以講一聲『唔關我事』就將個責任推嚟推去，之後就由得件事冇解決到！」立法會房屋事務委員會主席麥美娟認為，事件反映政府部門間溝通嚴重不足，且抱楚河漢界心態，造成職權轉交後個案即缺乏跟進，最後連累市民承擔代價。麥又稱，現時地政總署前線人手不足，或會延誤清拆，「之前質詢過地政署長，佢就話人手足夠。但係如果真係夠嘅話，又點可能霸咁多年官地都冇人理？」
記者︰呂耀焜