有人話，社會係一部汽車，政府係引擎，官僚係引擎嘅零件。咁就唔怪得香港危機四伏喇，港產官僚敷衍塞責，烏龍百出，成個政府好似一部五勞七傷嘅引擎，想唔死火都幾難。
港產官僚點樣敷衍塞責？睇一件事就知道。話說早前一場「長命」黃雨，搞到全港滿目瘡痍，塌樹報告多達四十幾宗，其中港島般咸道一棵百年老樹更加連根拔起，傷及兩名途人。中西區區議會尋日召開特別會議討論事件，強烈要求港府做好樹木管理工作，以及制訂樹木法，消除公共安全隱患，點知樹木辦官員一聽到樹木法就耍手擰頭，話本港欠缺具經驗人員，而且立法涉及公帑及執法問題喎，只表示會聘請顧問審視樹木辦嘅工作成效。
嗱，呢啲咪就係卸膊囉。制訂樹木法涉及公帑，唔通聘請顧問就唔涉及公帑？港府耗費咁多資源成立樹木辦，就係要負責統籌各部門嘅樹木管理工作，依家又話要聘請顧問審視樹木辦嘅工作，即係疊床架屋啫，咁唔係浪費公帑又係乜吖？正如學者話齋，般咸道塌樹事故係人為造成，懷疑有人喺樹頭附近掘坑，導致樹根折斷，樹基不穩，只有訂立樹木法，違例者需要孭起責任，至可以起到阻嚇作用，防止事故重演。當局一聽到立法就耍太極，何只敷衍塞責，簡直草菅人命！
咪話功夫茶踢爆，當局遲遲唔肯為保障樹木安全立法，欠缺人員只係藉口，欠缺承擔至係真正原因。生命無價，無嘢重要得過保障市民安全，唔夠人手咪培訓囉，唔夠資源咪諗辦法囉，點可以一句有困難，就闊佬懶理o架。近年塌樹事故不絕，而且多次搞出人命，樹木辦依然懶懶閒，唔通真係見到棺材都唔流眼淚？唔怪得有人批評樹木辦無心無肺，似足嗰啲外強中乾嘅危樹。
講開又講，港府施政甩甩漏漏，無心無肺嘅又點止管樹官僚吖。呢，鉛水風波持續擴散，又有屋邨中招嘞。牛頭角下邨第一期有六個食水樣本含鉛量超出世衞標準，最高超標近三倍，成為第四個「中鉛毒」屋邨，問你怕未。更令人擔心嘅係，當局曾經拍晒心口話居民停飲鉛水一個月後血鉛水平就會大幅下降，但係最早出事嘅啟晴邨居民停飲鉛水近一個月，依然驗出血鉛超標，反映問題並非官僚講得咁簡單，港府真係靠害。今時今日怪事特別多，市民出街怕冧樹，飲水怕中鉛毒，連坐飛機都擔心遇到上演九霄驚魂嘅國泰航空，香港有乜辦法唔變「危險之都」吖。
早前有居民請房屋署官僚飲鉛水，其實應該預埋樹木辦官僚一份至啱，提醒佢哋唔好再渾渾噩噩，胡混度日吖！