近期幾乎日日都有政黨開記者會講抽驗鉛水，但唔同黨派喺同一個地點抽驗嘅水辦都可能有唔同結果，一個話有超標、一個話冇超標，各黨仲鬥抽得多水辦、檢驗方法有幾嚴謹，之後又指摘對方驗得唔準，搞到居民人心惶惶，都唔知信邊個好，唯有等政府驗水結果。
鬥得較激烈嘅牛頭角下邨，民主黨（白鴿黨）七月中發現十個水辦樣本有三個含鉛量超標，但民建聯（民記）指摘對方水辦太少，「挑機」做足廿四個樣辦，之後話全部冇超標，仲派單張叫人「安心飲用」添。不過，最後政府公布牛下有水辦含鉛量超標，令民記驗水嘅可信程度受到質疑。除咗牛下，白鴿黨之前亦驗出大埔廣福邨，有樣本重金屬鎳含量超標近四倍。民記尋日又挑機，公布廣福邨同宏福苑嘅驗水結果，九十個樣本中，僅一個鎳含量超標一微克，但清洗水龍頭節流器後，再驗就冇超標。民記隨即被翻舊帳質疑早前牛下驗水唔準，但佢哋就話對結果有信心，仲批評白鴿黨叫住戶隨意攞水樽抽水，就算發現超標都未必準喎。睇嚟呢場驗水風波要過埋十一月區議會選舉後先至稍作緩和。