政情：觀音坐蓮 「強」身健體
上水鄉事委員會主席侯志強每次現身都好有台型，但估唔到佢原來做過廚師。佢早前同傳媒聚會時透露，多年前曾經喺芝加哥做過一段時間廚師，仲係「百彈齋主」，但正正因為佢敢於對每款菜式批評及提供好多意見，因而被挖角去經營另一餐廳。
煮鮑魚花足10日
佢話目前閒時都會落廚，好似煮鮑魚就特別有心得，佢話淨係洗鮑魚都要花兩日時間，之後要連續「扣」八日，每次「扣」完就放入雪櫃待翌日再煮，咁先夠入味喎。
除咗下廚，侯志強每日都有做運動同拉筋嘅習慣，以保持身體健康，佢即席示範「觀音坐蓮」式打坐，筋骨柔軟度比在場記者還要好，佢仲學過南拳、詠春等武術，得閒教個孫打功夫。佢又透露，兒子唔係任何時候都同意佢做事嘅風格，甚至因此嗌大交話要斷絕父子關係添，不過事後佢都會打電話氹番個仔。可能侯志強食過「夜粥」，當回應係咪參加立法會新界東補選時都「大耍太極」，話要等鄉議局決定喎。