政情：泛民八大漢 新東肉搏戰
立法會選舉明年就舉行，但唔少人已磨拳擦掌準備上陣。今屆立法會冇參選嘅民主黨（白鴿黨）前黨員、立法會前議員鄭家富（橡筋褲）已表明有意喺明年捲土重來，重奪新界東議席。最近被白鴿黨踢出黨嘅立法會前議員黃成智亦講明，會籌組新平台參選各場選舉，加上泛民主派將力保現有六個議席，現階段估計將會上演一場泛民八男子大混戰。不過，在僧多粥少下，恐怕血流成河，當中至少兩至三人會落敗。
橡筋褲「放風」復出
二○一○年因為不滿白鴿黨對政改立場而退黨嘅橡筋褲話考慮緊明年復出，又話一二年唔出選其中一個原因係太太患病，依家太太病情穩定，仲好支持佢繼續爭取民主。如果橡筋褲復出，估計都會選擇喺番新界東。另一方面，新界東亦都係黃成智多年努力經營嘅地區，佢出選亦非呢區莫屬。喺橡筋褲同黃成智夾擊之下，相信傳統泛民都要好好審時度勢，特別係白鴿黨面對住兩個舊黨員搶票，實在係危機四伏。
新丁接棒有難度
一直有傳白鴿黨主席、立法會新界東議員劉慧卿下屆將會退落嚟，讓位畀該黨總幹事林卓廷。退出公民黨（公文袋）並已宣布辭職嘅立法會議員湯家驊，佢嘅新界東議席預料會由公文袋新界東支部主席楊岳橋頂上。至於新界東「票王」、社民連議員梁國雄（長毛）亦都有意交棒畀佢哋嘅內務副主席黃浩銘。三位新丁知名度都遠比原議員低，相信面對橡筋褲同黃成智，對佢哋都係面對好大挑戰。
除咗泛民新丁有難度外，得到橡筋褲力撐而當選新界東議員嘅新民主同盟范國威（Gary）都應該頭痕，因為佢除咗一直被同樣都係西貢區議員嘅方國珊狙擊外，同時亦係激進派人民力量議員陳志全（慢必）嘅對手。當加上預料會角逐連任嘅工黨現任新界東議員張超雄，泛民八男子大混戰，最終成王敗寇，睇嚟都要埋身肉搏過先知喇。