中環出更：筆撐體育城 馮煒光疑遭勸停
新聞統籌專員馮煒光（IC）言論一向惹火，多次喺報章同社交網站撰文同學者及網民等筆戰，可見佢非常鍾意以文字支持政府各項政策，引起社會討論事件。不過，佢嘅熱心就未必得到各政策局嘅支持喇，有時仲擔心佢太惹火，會幫倒忙添，最近佢就因為想撰文力撐啟德體育城前期工程疑被勸停事件。
立法會財務委員會喺暑假前，啱啱好趕得切通過啟德體育城前期工程撥款。據了解，原來通過之前，IC曾經希望以演藝界均支持興建體育城為由，撰文力撐撥款申請，仲問民政事務局攞資料。事關啟德體育城一直被質疑，起好之後分分鐘會用嚟開演唱會，未必幫到體育界。
爭取演藝界支持 恐幫倒忙
民政事務局相信體育城可以幫到體育界提供多啲場地訓練，一直想避免有關演唱會嘅質疑成為輿論焦點，加上計過財委會應該夠票通過撥款，希望最好就咪提咁多啦，點知IC竟然想撰文，挑起演藝界支持，明顯同局方策略唔同。
結果局方都整理咗背景資料，同以往討論嘅重點畀IC參考，但最終IC篇文都冇出現。未知係咪被更高層嘅人勸停咗，多一事不如少一事呢？卓妮曾嘗試聯絡IC，但佢未有回覆。
卓妮