臭罌出臭草，有乜嘢阿頭，就有乜嘢機構，平機會自從由「廢鑊」周一嶽出任主席，就好似撞咗邪咁，唔止成為醜聞多多嘅政治花瓶，仲淪為公信力最低嘅公營機構，簡直獻世。
係咁嘅，個人資料私隱專員公署早前成功訪問逾一千名市民，了解廉政公署、私隱公署、消費者委員會、警務處、申訴專員公署及平機會六個執法及法定機構處理投訴嘅可信度，結果平機會成為包尾大幡，只有一成六受訪者表示完全信任，係六個機構中最低，有多達三成八人更加表明不信任添。正所謂，人無信不立。平機會嘅宗旨係消滅歧視、提倡平等，依家公信力包尾，仲點樣履行職務吖？
即係咁，平機會作為公帑供養嘅公營機構，公信力仲低過時下𡃁模嘅事業線，固然匪夷所思，但係作為烏煙瘴氣嘅混帳機構，市民投下不信任票一啲都唔奇怪。正如前平機會主任束健銘踢爆，市民求助平機會，本來想得到積極協助，但係該會接到個案後闊佬懶理，往往收集完投訴人及答辯人嘅意見就關人個關，根本無盡調查個案嘅職責，搞到每年被分類為終止調查嘅數字高企。更離譜嘅係，平機會官僚最鍾意擺官威，投訴人想約見面仲難過登天，只能靠書信溝通，唔知仲以為回到封建王朝添。大家話嘞，一間當市民透明嘅公營機構，何來公信力可言呢？
都係嗰句喇，上樑不正下樑歪，有周一嶽呢件廢電池喺度，平機會想唔墮落都幾難。撇開公信力低唔講，自從周一嶽執掌平機會，呢個政治花瓶簡直淪為醜聞集中營，唔係打壓異己爆出僱傭糾紛，就係貪威識食鬧出大花筒事件。呢，平機會處理市民投訴慢條斯理，為自己爭取福利就不知幾咁效率一流，又加開高層職位，又擴充辦公室，仲攤大手板要求政府每年增撥逾六百萬元公帑資助，你話係咪混帳吖？平機會成立十九年，冇做過幾多件正經事，反而醜聞多多，烏龍百出，加上廢鑊亂政，一味肥上瘦下，尸位素餐，更加衰多幾錢重。
冇計喇，鬼叫港府有眼無珠咩，千唔揀、萬唔揀，偏偏揀着呢件廢電池執掌平機會，點會唔出事吖。港府最近一口氣撤換兩名問責局長，聲稱清除官場瘀血，強化施政，其實，只要周一嶽一日仲留喺度添煩添亂，港府都幾難有運行。正所謂，慶父不死，魯難未已，如果港府真係想強政勵治，清除咗呢隻廢鑊先喇！