政情：亞視又甩轆 字幕報舊聞
通訊局前日就亞視新聞報錯「王維基買亞視」，重罰三十萬元，但估唔到尋日又再「甩轆」！亞視尋日新聞報道嘅流動字幕，全部變成前日嘅新聞提要，仲要播足超過一分鐘，如果今次又被人寫信去通訊局投訴，唔知又要罰幾多錢呢？
亞視新聞畫面底部通常會有一行藍色流動字幕顯示當日嘅新聞提要，但尋日亞視《六點鐘新聞》嘅流動字幕就重播前日「舊聞」，包括「啟德煥然壹居市價八折出售」等等，仲要播足分幾鐘，工作人員才知道「甩轆」出錯，即時更正。
不過，報錯新聞對現時嘅亞視可說是「零壓力」，因為通訊局嘅「極刑」釘牌已經完全失效，原因係亞視嘅續牌申請已經被行政長官同行政會議拒絕。此外，亞視宣布由八月一號起恢復《亞洲早晨》及《十二點半新聞》兩個新聞時段，新聞時間多咗，豈不是增加出錯機會？