政情：Jason探路 籲港撤韓旅警
南韓早前爆發新沙士疫情，香港發出旅遊警示勸籲市民切勿前往。不過，康泰旅行社董事總經理黃進達（Jason）一於少理，四日前親身前往南韓仁川及首爾，發覺當地已從疫症嘅恐慌中恢復，認為港府無必要繼續維持紅色外遊警示喎。
Jason話自從上月港府發出外遊警示，南韓旅行團全部叫停，令到好多打算到南韓歡度暑假嘅市民裹足。Jason明白面對新沙士疫情，大家都不可掉以輕心，但係南韓今次疫情一直都係發生於醫院範圍，況且自今個月初以來，南韓已經有廿多日無出現新增確診病例喇。
綜合各種訊息，Jason認為當地疫情已成過去，所以佢亦飛去南韓發掘新景點畀團友開下眼界。對於南韓「還以顏色」以流感為由向香港發出藍色旅遊警示，Jason相信港府一旦取消南韓嘅外遊警示，對方亦肯定會釋出善意喎。