中環出更：榮升「會長」
民政事務局前局長曾德成被炒，有傳係因為青年工作做得唔好，令青年問題再度炒熱。香港區潮人聯會近日就決定要加強青年工作，仲將原有嘅青年部升呢做青年委員會，青年事務委員會前主席陳振彬及民政事務局政治助理徐英偉都有捧場。青委會會長陳家榮話，過往青年部已經有二千位成員，希望升呢後可以團結會員，壯大青年工作。
青委會升呢，唔通潮人聯會對青年工作「忽然關注」﹖陳家榮就話，佢哋只係覺得以往青年部做得唔夠，加上愈來愈多會員，所以希望趁機會壯大青年工作，透過舉辦多啲活動，加強同內地交流，拉近兩地距離。
陳南坡感觸社會風氣麻麻
副會長侯佳璇就話，依家部分青年人好偏激，希望青委會可以傳承潮州人互助互愛傳統，凝聚青年人做啲公益事業喎。似乎兩位正、副會長都雄心勃勃咁喎。
香港過去一年經歷佔領行動、「鳩嗚」等大型群眾示威，潮人聯會會長陳南坡就好感觸話，睇到青年工作真係好重要，又話覺得依家啲社會風氣麻麻哋，所以決定要喺青年工作上加大力度，將原有嘅青年部升呢，提供多啲資源發展。陳振彬做咗青年工作咁多年，唔知有冇向一班青委分享吓經驗同心得呢？
卓妮