近年有個新興名詞叫「窮忙族」，意思係即使有工作，收入都好低，永遠得個忙字，簡單講就係在職貧窮咁解。窮忙族愈來愈年輕化，唔止成為社會問題，更加成為政治危機添。
有團體研究發現，過去廿年本港大學畢業生嘅薪金不增反減，一九九三年起薪中位數超過一萬三千一百元，二○一三年竟然降至一萬零八百六十元，跌咗接近兩成；而近十年來嘅大學畢業生，薪酬累積加幅亦遠低於以前嘅大學生。不可不知，過去十年本港GDP每年平均增加百分之四點五，累計大約增加咗五成，即係話蛋糕做大咗，大學生反而分少咗，你話係咪有問題吖？
學者係咁講嘅，大學名額增加，導致學歷貶值，影響大學畢業生嘅薪金，加上香港產業結構單一，高技術職位不足，青年社會流動性下降。其實計功夫茶話齋，大學生愈來愈多，學歷嘅含金量固然冇以前咁高，但呢個並唔係主要原因，大學生收入下降主要係因為產業結構單一，香港一直獨沽金融地產，唔係炒股，就係炒樓，其餘選擇唔多，根本冇機會向上流動，大學生收入又點可能增加吖。
呢，早前有項調查發現，七成受訪青年認為好難搵到一份有前景又穩定嘅長工，近四成認為自己屬於在職貧窮，一成受訪者估計自己永遠無法脫貧添。試諗吓，年輕人既不滿現狀，更睇唔到前景，有乜法子唔怨聲載道呢？學者警告，港府再唔諗辦法解決青年就業及社會流動問題，好可能再次引發大型社會運動。
冇錯嘞，近年青少年問題多多，有啲人淪為街頭鬥士，愈來愈激進，咪就係因為對現實不滿囉，尤其係舊年嘅佔領之亂，可以講係深層次矛盾嘅一次大爆發。有人認為港府可能會失掉整代年輕人嘅支持，雖然有啲誇張，但照目前嘅形勢發展落去，前景一啲都唔樂觀。須知香港衣食住行樣樣難，房屋更係一個大問題，好多年輕人連一個安居之所都成為奢望，唔激氣就假。
正如梁啟超話齋，少年強則國強，少年智則國智。年輕人係社會嘅未來，依家青少年問題多多，未來香港會係點，估都估到喇。早前港府承認青年工作做得唔夠，諗住亡羊補牢，喺扶貧委員會設立專責小組討論青年向上流動問題，講就好聽喇，但究竟做唔做得到，仲要睇過至知。
講到底，港府冇能力推動經濟多元發展，提供向上流動嘅機會，青少年問題就冇可能解決，而青少年問題解決唔到，香港就冇可能有運行。