國泰近期超賣機票變本加厲，被人投訴到阿媽都唔認得！「蠢人永遠做蠢事，你話唔到佢，今次唔做下次都做！」估唔到曾主席嘅金句，完全適用於服務質素每況愈下嘅國泰！曾經有過光輝歲月嘅國泰，估唔到好學唔學，話超賣機票係「行規」，以慣例為由將不公平超賣積非成是，咁走「法律罅」而不知自律自愛，不懂珍惜曾建立嘅羽毛，再如此死不悔改超賣機票，好快就會畀乘客唾棄！
擅以廣東話入詩嘅廖鳳舒，佢有一首詠秦二世嘅詩，詩云：夠之大癮火麒麟，呢件龍袍重幾新。未必乖哥唔識鹿，果然太監係閹鶉。一堂鼻涕真衰仔，二世頭銜咁嚇人。點估江山全送晒，亡秦應晌亞胡身。
廖鳳舒以廣東話作詩，無論詠史諷刺時事都十分傳神，呢首寫秦二世為敗家仔，便刻畫得相當過癮，秦二世雖然係「蠢仔」，之不過，都不至於連馬與鹿都分不開；佢咁做迫於形勢也，敗秦江山嘅責任，明顯趙高大於二世。
回頭睇吓國泰，管理不善昭昭明甚，一錯再錯依然繼續錯下去，超賣機票累畀咗真金白銀（仲要比一般航空公司貴）嘅旅客「有票無位」，延飛個案多如天上繁星！咁搞法，國泰唔好話服務質素繼續飛流直下三千尺，睇怕好快步秦二世後路！「禾米食完麻雀散，留番光塔伴紅棉」，一間企業由盛轉衰，有因有果可尋也！
有人說在諸多災難預言還沒有實現之前，人們多如看戲。災難和我們息息相關，可是「跟我無關」，這是我們當代社會真正的災難。國泰超賣機票積非成是，仲以為好有道理，以「行規」企圖製造「與我無關」嘅假象，不肯改善而係一錯再錯，那只好步「亡秦」之路，留番光艙伴赤鱲，一旦乘客聞「國泰」而色變，說不定國泰可以成為香江遺迹另一勝景！