政情：白鴿新口號似盡元朗足球會
近日有本港歌手新歌被指抄襲外國歌曲，這股疑似抄襲風最近由娛樂圈吹到政圈。我哋收到投訴，指民主黨（白鴿黨）葵青區疑似區議會參選人團隊嘅「為葵青－搏盡！」宣傳海報，由口號、設計、以至字體，均與元朗足球會沿用多時的宣傳品極相似。原來葵青團隊只是「抄上抄」，真正抄襲「源頭」為民主黨創意媒體部，新裝修的民主黨太子總部大門，亦有一幅類似的「為香港－搏盡！」大型布景板。
元朗：兩年前已使用
元朗足球會主席兼新民黨區議員王威信話，球會兩年前已經喺會刊、橫額等宣傳刊物上使用「為元朗－搏盡」嘅口號，亦曾經喺巴士度賣廣告，社會上唔多人用呢句口號，但承認「搏盡」對於喺港大讀書嘅人都唔陌生。佢話係咪抄襲不得而知，留待公眾評論，球會現未有時間討論事件，會研究係咪需要採取行動。
民主黨堅稱屬原創
民主黨創意媒體部領導羅健熙及黎敬瑋接受查詢時，異口同聲強調有關口號是由他們原創，意念正是民主黨會為香港市民搏到盡，否認抄襲，而除了葵青團隊，該黨其他地區團隊亦可能沿用同一口號和設計。
即使今次宣傳海報口號只是「如有雷同、實屬巧合」，但該黨的所謂創意實在令人質疑，況且該黨早前豪花近七百萬元，在荔枝角區購入一個逾一千呎的工廈單作創意媒體部辦公室，理應大有作為，可惜現在創意欠奉。