中環出更：劉江華坐火箭 蘇錦樑變「電車男」
上星期兩個問責局長被免職，原本任職政制及內地事務局副局長嘅劉江華就升任民政事務局局長，之後仲話商務及經濟發展局局長蘇錦樑（Greg蘇）本來都喺被炒名單中。咁啱劉江華同Greg蘇尋日分別出席唔同公開活動，劉江華喺活動上放火箭氣球道具時，個氣球就一飛沖天，相反Greg蘇出席電車宣傳活動時就被傳媒問到口窒窒兼九唔搭八。一個「坐火箭」、一個做「電車男」，真係同人唔同命。
劉江華尋日出席由太空館主辦嘅少年太空人體驗營活動，係佢升呢做局長後首個公開活動。佢全程笑口噬噬，仲撩一班準備出發嘅小太空人傾偈。其後各主禮嘉賓要喺火箭道具上按掣，等太空人公仔隨氣球升高，寓意小太空人順利升空。擔任主禮嘉賓嘅劉江華按掣後，佢嘅太空人公仔就迅速升高，最終脫穎而出，同佢火速上位可以話係如出一轍。
另一邊廂，上星期開始放假至下月九日，尋日特登返一日工出席電車活動嘅Greg蘇，就被傳媒問到口窒窒。
蘇口窒九唔搭八
被問到炒魷傳聞時，首先佢話唔評論揣測報道，總之每個官員都有進步空間，唔會評論自己，跟住又突然自爆上星期休假返咗內地農村同小朋友交流，覺得當地環境簡樸，生活非常愉快，好多時間諗開心嘢，所以返香港後都覺得只要多啲諗美好一面，社會就會更好喎。之後佢又再無啦啦話問責團體係好團結同合作無間，真係九唔搭八。
講番少年太空人體驗營，中華總商會副會長馬忠禮話，佢都鼓勵子女參加，可惜佢大仔因為生得太高唔合資格，而細女要到下年先夠十二歲先符合資格。所以話太空人唔易做o架。
卓妮