唐太宗有句名言︰「為政之要，惟在得人。」睇吓當時嘅管治團隊，有外戚、有隋朝舊臣、有布衣之士，甚至連政敵嘅心腹謀士都來者不拒，可謂海納百川，不拘一格，唔怪得可以創下貞觀之治喇。可惜時移勢易，今日唔係盛唐，港府更唔係唐太宗，「惟在得人」就冇喇，用人唯親就有，你話施政有乜法子唔甩甩漏漏，烏龍百出吖。
呢嗱，話口未完又嚟嘞。繼前政務官栢志高出任西九文化區行政總裁後，港府日前又宣布委任前政府律師黃繼兒出任私隱專員，接替合約即將屆滿、同樣係退休高官嘅現任專員蔣任宏。
講真，公營機構早就淪為退休高官俱樂部，市民早就見怪不怪咯。聽吓港府今次又點解釋。據講黃繼兒係人權法方面嘅權威，可以帶領私隱公署更上一層樓喎。不過外界就唔同睇法喇，有立法會議員質疑政府「塘水滾塘魚」，淨係選用聽話嘅人出任重要公職，未能吸納新血，擔心私隱公署獨立性受損。而學者就直指政府用人「防守有餘，開拓不足」。
即係咁，新專員表現係點，仲要睇過至知，但由退休高官把持嘅公營機構，多數烏煙瘴氣，七國咁亂，就係人都知。好似私隱公署咁吖，蔣任宏擔任郵政署署長時，曾爆出針孔攝錄機監視員工嘅醜聞，當時大家對佢出掌私隱公署已經冇乜信心，佢上任後果然烏龍百出，正經嘢冇做過幾件，反而多次鬧出笑話，最經典係以自己名義寫信畀私隱公署，投訴公署所在大廈嘅管業處，問你服未。
當然啦，要數公營機構嘅亂象，又點可以漏咗平機會。係人都知，平機會主席周一嶽做食衞局局長時渾渾噩噩，導致醫療事故無日無之，食物安全危機處處，早就神憎鬼厭，點知港府千揀萬揀，偏偏揀呢舊廢電池出掌平機會，結果咪搞到爭議多多，滿城風雨囉。計功夫茶話齋，政府頻頻翻閹過氣廢官，點止「開拓不足」咁簡單吖，直頭係添煩添亂，唔衰攞嚟衰喇。
大家可能會問，點解政府對退休高官情有獨鍾？好簡單啫，高官退休後想過檔私人機構搵真銀，有「過冷河」等限制，反而公營機構及政府內部開位，當局大筆一揮就得，話都冇咁易。花花轎子人抬人吖嘛，有着數梗係益自己人喇。問題係，公營機構喺退休庸官領導下，表現一蟹不如一蟹，真正有才能者見到呢堆爛攤子無不耍手擰頭，最終咪導致劣幣驅逐良幣囉。
講多無謂，食多會滯。反正公營機構多數成事不足，敗事有餘，與其多隻香爐多隻鬼，浪費公帑，不如諗吓點樣精簡架構仲好喇！