教育局三年前諗住推行德育及國民教育科，點知胎死腹中，仲搞到滿城風雨。三十八個團體趁住反國教三周年，聯署反對國教科滲入校園，當中包括學民思潮、傘下爸媽及教協等團體。不過，當年憑着反國教成名嘅學民思潮召集人黃之鋒及前發言人周庭，喺三周年呢個日子竟然唔見人，據聞前者去咗拍拖，後者就去動漫節幫朋友推銷產品，實行闊佬懶理。
尋日嘅記者會上，代表學民思潮發言嘅只得兩名前發言人，分別係黎汶洛及劉貳龍，但就唔多見黃之鋒同周庭嘅蹤影。問到黃之鋒喺呢個重要日子去咗邊，學民思潮成員都支吾以對，似乎都唔好意思講佢掛住拍拖，雖然黃之鋒事後有喺社交網轉貼記者會嘅消息，但都似乎講唔過去囉。
黃尋晚在社交網回應缺席反國教三周年記者會一事，自稱在早上十一時三十分至下午二時去咗公民教室演講，下午三點半又去咗接受訪問講修改基本法運動，話人屈佢去拍拖而唔去記者會喎。不過，實情記者會係喺下午二時半至四時許舉行，但黃之鋒就只係交代自己在記者會前後時段做過啲咩，而佢喺記者會期間去咗邊就唔知喇，況且話佢拍拖嘅講法係有可靠消息透露，並非老作，倒不如佢以私人理由話唔交代去咗邊算啦！