政情：中環出更：區璟智掌協青 有板有眼
政界人物周身刀、多瓣數，唔少都會身體力行參與社區服務，好似外號「頭箍小姐」嘅財經事務及庫務局前常任秘書長區璟智，同無止橋慈善基金義務秘書紀文鳳，就分別擔任協青社會長及常務委員。協青社尋日開設咗個滑板場，幫助青少年輔導工作，兩位女將就好貪玩咁即場試企喺滑板上，但就要人傍到實一實。佢哋仲透露個人未來去向，一個會投身教育，另一個則會返內地做義工，睇嚟離開政界後生活仍然多姿多采。
「頭箍小姐」入港大教經濟
區璟智退休後做咗協青社會長，話想用街舞、滑板、音樂去吸引青年人，等佢哋可以發揮所長。佢好似對青年服務特別有心，原來佢九月仲會去香港大學做助理教授，會喺School of Economics and Finance教經濟，個課程主要教財經政策制訂，「香港要做國際金融中心，中港經濟融合係大趨勢，但要平衡社會發行人、持份者等利益。」
紀文鳳沈祖堯將攜手起橋
喺政府部門工作咁多年，區璟智應該有唔少心得教學生，佢一講經濟就好興奮，用咗好多經濟用語，聽到卓妮一頭霧水，佢仲話已經備好課，好期待開學。
人稱「千眼千手觀音」嘅紀文鳳，係廣告同商界嘅傑出女將，亦係無止橋慈善基金發起人之一，基金成日都會搞活動，帶學生返內地貧窮村莊起橋同設施。紀文鳳下月就會同香港中文大學校長沈祖堯去重慶起橋，去足三日，「祖堯BB好有心，好支持無止橋義務活動。」基金最近出咗本新書，寫義工故事，亦都有請紀文鳳同沈祖堯撰文，紀文鳳話啱啱完咗嘅書展都賣出咗唔少。
卓妮