香港房屋問題不斷惡化，安居樂業成為好多基層市民遙不可及嘅夢想，搞到劏房、棺材房、太空艙、籠屋遍地開花，七國咁亂。呢，上周兩名床位住客因電視噪音問題而互相追斬，令籠屋問題再次成為社會關注焦點。
正所謂，相處易，同住難。籠屋環境狹窄，衞生惡劣，一班互不相識嘅「籠民」逼喺同一屋簷下，各人生活習慣唔同，加上成日要爭廚房、爭廁所，想唔發生衝突都幾難。本報記者走訪多區發現，無牌床位充斥各區，環境惡劣、衞生欠佳不特止，連走火設施都欠奉，萬一發生火警，後果不堪設想。有團體估計，本港現時仍有五、六千名籠屋床位租客，雖然新式籠屋比以前整潔，但好多仍然唔符合消防規定，有啲連滅火筒都冇，簡直危機四伏。
係人都知，籠屋係香港獨有嘅產物，上世紀五十年代已經出現，九十年代盛極一時。自從港府制訂《床位寓所條例》後，規定擁有超過十二個出租床位嘅單位必須領牌，持牌床位寓所由六十三間減至十間，但無牌床位寓所就不減反增，有價有市。
即係咁，有需求就有市場。香港樓價高租金貴，就算係不見天日嘅棺材房，呎租都可以媲美半山豪宅，唔少基層市民惟有退而求其次，棲身於租金相對較低嘅籠屋床位。正如社福界人士話齋，業主都係為咗賺錢啫，一個床位月租千五元，一個大單位最多可以住一百人，每個月收入十幾萬元，都幾和味。唔怪得籠屋長盛不衰，愈做愈有喇。
所以話，籠屋既係香港獨有產物，亦係香港之恥。幾年前外國傳媒廣泛報道之後，籠屋一舉成名天下知，當時有外國女記者曾訪問港府，得到嘅答覆係，佢哋自己揀住籠屋，係因為租金平同方便喎。你話港產官僚係咪涼薄吖？
有頭髮冇人想做瘌痢，咁多市民被迫棲身籠屋，唔係貪方便，而係無可奈何。試諗吓，如果有得選擇，邊個願意幾十人逼喺一個豆腐膶咁大嘅單位呢？邊個又願意屈居喺只有兩三呎闊嘅床位呢？
見微知著，籠屋問題正正係港府無能嘅見證。香港話就話係富裕地區，港府更加肥到着唔到襪，但好多市民上無片瓦遮頭、下無立錐之地，稍有經濟能力嘅住劏房，冇辦法嘅惟有住籠屋，居住環境連第三世界都不如，諗起都可悲。香港搞成咁，唔係港府嘅責任又係邊個嘅責任！
講到尾，港府一日唔增加公屋供應，房屋問題就冇可能解決，而房屋問題解決唔到，籠屋亂象就冇可能消失，哀哉港人！