政情：公民講場：關愛基金驗私樓水民協亂抽水

區議會選舉臨近，近期政黨爭相狂抽鉛水化驗博曝光，但喺鉛水風波中「捉到鹿都唔識脫角」嘅民協，可能自覺形勢落後，近日變陣增加多條戰線到關注私人樓宇水質。民協十多名成員尋日就到政府總部外請願，要求新上場嘅民政事務局局長劉江華，喺關愛基金增設私樓驗水計劃，資助私樓住戶驗水同驗喉管。其實現時市建局已有樓宇維修綜合支援計劃，如果又再加多筆關愛基金資助驗水，不如政黨向政府爭取埋津貼幫市民買樓喇，為選舉真係乜都夠膽做。