政情：今日你上鏡：見完陳家洛楊偉雄閃入升降機

盛傳將會做局長嘅特首創新及科技顧問楊偉雄，上星期因為被蜜蜂所傷而臨時取消同公民黨立法會議員會面，當時陳家洛仲寸嘴話，避得一時避唔到一世，講到好似楊偉雄玩嘢特登唔見佢咁。事隔一星期，楊偉雄尋日終於成功同陳家洛見面，游說對方支持成立創新及科技局。兩人會面大約一個半小時，楊偉雄離開時似乎好怕醜，婉拒同陳家洛合照，仲一支箭咁飆咗入升降機，隔住道升降機門同陳家洛握手時全程耷低頭。陳家洛就話，遲啲會再次邀請楊偉雄去財務委員會接受質詢。但肯見楊偉雄嘅議員都見得七七八八，咁仲叫楊去財委會為乜呢？最重要係無合適嘅身份出席。