立法會議員薪津委員會尋日同政府開會，爭取提高議員助理（議助）嘅人工。民主黨劉慧卿、工黨李卓人會後見記者時話，依家有五成幾議助嘅人工係一萬五千元或以下，對大學畢業兼工時長嘅佢哋好唔公平，唔單止造成流失率高，仲間接拖低咗議員嘅議政水平，所以要求議助嘅人工同公務員掛鈎。不過，睇番過去議助嘅質素同表現，若然真係同公務員薪酬掛鈎，大幅度提升佢哋嘅人工，恐怕會惹來納稅人不滿。
公務員薪酬待遇好就係人都知，但公務員設有考核制度，要成為公務員並唔係咁容易。相反，議助冇考核制度，而且唔少議助本身係議員嘅親戚、黨員，甚至係區議員，質素良莠不齊，根本唔可以同公務員相提並論。
另外，部分議助平日花唔少時間搞抗爭，好似去年嘅佔領行動，有議助竟然同佔領人士裏應外合，意圖策劃衝擊立法會，又擅自將立法會資源供應畀佔領人士；過去亦試過有議助玩𨋢阻礙議員前往會議廳投票。
至於議員成日話唔夠錢做政策研究，其實每名立法會議員每年有二百三十幾萬元辦事處營運開支，搞少啲個人宣傳同揈少啲錢，咪唔使攤大手板問政府拎錢囉。