政情：抗拒新愛國 德成冇運行
中央政府與特首梁振英（CY）提早將原民政事務局局長曾德成及原公務員事務局局長鄧國威免職，震驚整個政壇，尤其係年輕時因派發反殖民傳單而坐過監嘅曾德成被「炒」，引發不少「老愛國」不滿。據悉，曾德成與鄧國威被炒，確實不止與兩人未有做好青年人及公務員嘅「人心回歸」工作有關，還涉及多項諮詢委員會及政府人事任命上，與最高層嘅指示對着幹。其中曾德成更被指過分維護本地嘅「老愛國」，抗拒委任獲CY以至「西環」提攜嘅「新愛國」人士。
鄧國威被炒後，多個之前批評佢唔肯聽意見嘅公務員及紀律部隊團體，都先後公開或私下叫好，並對做過紀律部隊首長、擅於同工會打交道嘅新任公務員事務局局長張雲正有好高期望。
「老愛國」抱不平 搵人投訴
相反，對於曾德成被炒，政界嘅反應就相當極端，不少「老愛國」都替呢位老戰友不值，認為曾德成一生愛國，冇理由落得如此下場，紛紛透過唔同渠道、在明在暗咁對有關方面表達不滿，據聞部分人仲走去「西環」投訴添。不過，消息話呢批「老愛國」真係搵錯人投訴，因為曾德成被炒嘅「罪狀」，除咗喺多項諮詢委員會及授勳名單任命上抗拒CY嘅人，連部分由「西環」推薦嘅人都曾經被佢「彈票」。
傳為授勳名單「吵大鑊」
眾所周知，近年「西環」提名咗好多本港及內地商界出身嘅「新愛國」人士畀特區政府，唔少本地「老愛國」都對有關做法有微言，質疑呢班「新愛國」除咗有錢之外，對特區嘅愛國事業並無實質貢獻。
有傳曾德成早前曾就一位涉嫌喺內地參與過違法活動嘅「新愛國」人士任命，與CY公然「吵大鑊」，甚至揚言要為此辭職。但其實大家都知道有關推薦係來自「西環」，根本與CY無關，最後曾德成變成「被辭職」。行政會議成員張志剛尋日出席電台節目時，聲稱愛國並無新老之分，今次事件與「新愛國」與「老愛國」之爭無關，真係講都未必有人信。
「老愛國」對曾德成嘅歌功頌德，某程度亦反映佢哋對新任民政事務局局長劉江華嘅不信任。雖則劉江華做過本地最大愛國政黨民建聯嘅副主席，但不少「老愛國」至今仍記住佢係港同盟（民主黨前身）出身，唔夠曾德成根正苗紅。劉江華以後同呢班「老愛國」打交道時，可能要加倍留神至得喇！