近日香港各界陸續收到冒認「中聯辦」電話，聲稱對方喺內地干犯罪案，要求畀錢，尋日就又有一名九十後少女，被騙徒以同一手法呃走七萬元，甚至連立法會亦受害。立法會秘書處總務部尋日朝早發電郵通知，話有唔少秘書處職員接獲自稱中聯辦人員嘅電話留言，以「取回文件」等方式呃職員按錄音指引，致電指定電話回覆。
總務部引述番中聯辦有關負責人日前公開澄清，講到明中聯辦及內地公安、檢察機關從未、亦冇可能直接向香港市民發送呢類電話留言，強調上述行為純屬騙局，提醒如果接獲類似電話，應保持警覺，唔好輕信，亦不應透露任何個人資料。
其實依家Android手機Play Store有唔少冒認電話號碼程式下載，部分程式下載次數更超過一千萬次，程式標明可以偽造來電顯示號碼，當作惡作劇呃朋友，但就好被不法之徒用嚟行騙。有互聯網專家建議，可以考慮安裝一啲能夠過濾來電號碼功能嘅軟件，若果發現有可疑電話號碼，應該立即將號碼上報，加入程式過濾名單。
卓妮