中環出更：仁愛堂訪喜靈洲大開眼界
慈善團體定期會到懲教署轄下唔同院所探訪，而今年仁愛堂就拉隊去咗一個較少開放參觀嘅冷門地方，就係喜靈洲懲教所及戒毒所。仁愛堂主席史顏景蓮（Kimmy）話，釋囚接受教育可以提高佢哋重投社會嘅機會，所以決定以行動兼捐款十萬元支持在囚人士及懲教署人員子女嘅教育工作。
仁愛堂一班成員日前坐船去喜靈洲，見島上設施比其他院所色彩豐富，又飼養奇珍異獸，懲教署署長邱子昭解釋，因為喜靈洲係屬於低度設防嘅院所，多年前係痲瘋病院，加上現時主要用作康復治療，所以感化元素會較其他院所多。而島上因為環境特別適合不同動物物種棲息，所以海關緝私檢獲嘅部分稀有動物會被送到島上，如估計市值二十萬元的軸射龜、小葵花鳳頭鸚鵡及藍黃金剛鸚鵡等，均由島上經過訓練嘅在囚人士照顧。
史立德捐款支持在囚學習
見Kimmy、其丈夫兼仁愛堂前主席史立德及子女對懲教工作亦十分感興趣，於探訪期間亦問到喜靈洲嘅歷史及懲教署提供咩類型嘅培訓等，當知道在囚人士會有機會學習寵物美容，史立德仲即時決定另捐二十萬元支持「在囚人士教育信託基金」及「懲教署人員子女教育信託基金」，希望盡一分力助釋囚日後融入日常工作環境。
除懲教所內嘅寢室、製衣工場及飯堂，佢哋仲去咗參觀喜靈洲水耕栽培區及試食在囚人士親手製作嘅蛋糕。
由於當日進入懲教所期間所有電子儀器都需要被臨時收起，蔡少森等一班總理參觀完後，即急不及待要去攞番部電話睇訊息，笑言島上冇咗電子產品嘅生活並唔易適應喎。
卓妮