話說有個小朋友飽受拖延症困擾，於是向爺爺求救，佢爺爺就話嘞︰「其實我後生時都有呢個病，後來朋友介紹咗個醫生畀我，話療效唔錯喎……」「結果呢？」「我打算聽日去睇」。
咪以為只係笑話呀，港府做嘢議而不決，決而不行，「病情」分分鐘比呢位爺爺仲嚴重呀！呢，港府話要將維港打造成世界級海濱，大大話話已經吹咗超過二十年，仲煞有介事咁成立海濱管理局統籌其事添，可惜有姿勢冇實際，成條海岸線至今只有十分之一建有海濱走廊。最弊係即使斷橛禾蟲，分段發展，一樣慢過蟻躝，好似東區海旁咁，當局○九年進行研究，拖到依家仲係只聞樓梯響，有關地段仲係爛地一塊，問你點頂。
功夫茶仲記得，規劃署當年就發展港島東海旁進行公眾諮詢，亦曾諮詢立法會同埋區議會，反應都幾正面，而當局三年前亦完成研究，提出興建行人板道、海濱長廊以及優化海旁街道等多項建議，大家以為萬事俱備，只欠東風啦，點知臨時殺出個程咬金。負責興建嘅土木工程署話喎，建議方案仲要進一步技術評估，包括填海工程係咪符合法例，話署方已經委聘顧問研究。喂，如果真係有法律問題，一早就應該諗到喇，點解事到臨頭先鬼拍後尾枕？仲要研究到幾時先得？
冇符喇，議而不決係港府嘅老毛病，大家早就見怪不怪，問題係官等得市民唔等得，東區海旁向來深受釣友歡迎，唔少人用木板「搭橋」走出海中心垂釣，搞到險象環生，最近就有釣友因為咁浸死嘞。
所以話啫，官僚拖拉成性，胡混度日，直頭累人累物累街坊。有地區人士就講得啱嘞，成個計劃拖咗咁耐，竟然連最根本嘅問題都解決唔到，政府擺明失職。退一步講，即使填海真係唔可行，都應該諗吓其他替代方案，總好過笪地一直空住，仲帶嚟安全隱患吖嘛。
講番維港，係人都知維港係香港最寶貴嘅天然資源，只要做好包裝配套，唔單止可以為市民提供多個消閒去處，仲可以吸引更多旅客。有咁好嘅本錢都唔識利用，簡直暴殄天物。其實除咗維港之外，全港仲有二百多個離島，景致各具特色，都係好豐富嘅旅遊資源，當年沙士過後，港府係威係勢話要發展離島遊，可惜到最後又係不了了之。
真係諗極都唔明，政改一類議題爭議多多，港府就話冇能力處理啫，發展維港有益民生得嚟爭議亦唔大，點解咁都搞唔掂呢？唔通班高官真係飲太多鉛水，搞到癡癡呆呆，坐埋一枱？