物必先腐而後蟲生——睇吓國泰呢排醜聞不絕，混亂事件層出不窮，因超賣機票問題搞到乘客怨聲載道，充分予人管理不善的深刻印象。
至於甩甩漏漏嘅事件，更是罄竹難書，好似延誤、系統故障、食水含大腸菌群、失巨款……你睇，國泰不單止混亂，簡直係混吉！
何昔日之芳草兮，今直為此蕭艾也！去年全球最佳航空公司獎，國泰由第一變第三，排名第三嘅新加坡航空則上升一位去到第二位，卡塔爾航空繼二○一一、二○一二年後再次奪冠！
睇嚟國泰管理不善，爛撻撻，唔負責，未來排名只有更下一層樓矣！服務行業亦如逆水行舟，不進則退！由芳草變蕭艾，國泰咎由自取也。
國泰醜聞愈爆愈甘，最新一單係有曾任空姐嘅市民向本報投訴，目擊一名空少，於航機起飛及着陸兩個關鍵時刻，坐於緊急座位上「撳手機」長逾五分鐘，更明目張膽疑似瞓覺。
眾所周知，被安排坐於緊急座位的空服員，負責協助乘客於空難意外時逃生，主宰着全機乘客安危，呢位空少當值時，竟然不緊守崗位，罔顧職責，搵乘客安危「較飛」，國泰管理混吉，彰彰明甚！
事實是：坐於逃生門附近緊急座位嘅機艙服務員，繫上安全帶，隨即進入行內俗稱Silent Review狀態，需於腦海重溫一系列嘅安全及緊急逃生方法，故即使閉目養神亦不該，何況持續把玩手機！
世界這麼大，老朽還想於夕陽晚景時，出去見識吓，之不過，一個服務愈來愈吔吔烏嘅機構，如果話佢仲有一絲希望，睇怕亦活像玻璃窗上嘅烏蠅——前途光明，沒有出路！下次出國旅行，老朽情願選擇廉航！