立法會本立法年度最後一次大會於上周初舉行後，一批統計數字陸續出爐。立法會秘書處尋日有一份文件，統計七十名議員於過去三個立法年度提出動議無約束力嘅議案數目，及申請失利嘅次數，發現最黑仔係中總代表廖長江（Martin），合共多達十二次申請失利，其次係公民黨議員郭家麒，前後共有十一次。
郭家麒稱早前試過排議程排唔到，或讓路畀六四辯論，所以申請咗都決定撤回，因此過去三年只試過提出一次動議辯論。值得一提嘅係，被視為「四大懶蟲」之一嘅鄉議局代表劉皇發，過去三年都未「開齋」，冇提過任何動議辯論，
文件同時顯示，一眾議員於過去三個立法年度，普遍只獲分配一至兩次議員議案辯論。有心水清嘅政界中人分析，或者同激進泛民於財政預算案連續多年拉布有關，搞到好多大會都冇咗議員議案辯論，舉例指於二○一二至一三嘅立法年度合共有五十次動議辯論，二○一三至一四年度就下跌至只有四十次，而本立法年度再銳減超過一半，合共僅得十八次。