港府早前要求立法會財務委員會加會長達廿八小時，民生項目撥款一如所料全數通過，但成立創新及科技局撥款申請因泛民拉布而被拉倒，三年內第三度難產，預計十月復會再度闖關。剛卸任財委會主席嘅張宇人率先預告，好大機會唔會連任下屆財委會主席，又自言財委會主席冇權力「剪布」，自己亦唔懂得「剪」，笑言「劈友」易過「剪布」。根據建制派早前內部協議，下屆財委會主席根本冇張宇人份，莫非佢心郁郁，再作表態其實係想以退為進？
據悉建制派基本上已放棄由金融界議員吳亮星接掌下屆財委會主席，依家只剩低兩個選擇，一係撐張宇人連任主席，一係撐最近不時向泛民開火嘅保險界議員陳健波（波哥）「升呢」任財委會主席。
據知撐波哥一方認為對方表現硬淨，值得再上一層樓；有部分建制派則認為，如貿貿然換上新手接任財委會主席，或會被泛民玩殘。講到底，張宇人忽然就財會連任再作表態，莫非佢真係於腦海中閃過連任嘅情景，所以趁機以退為進？