政情：建制輸內訌 泛民贏得醜
佔領行動及政改否決後首場選戰、大埔區議會新富選區補選昨晨完成點票，結果一如外界所料，喺建制派內訌有兩名候選人互相分票下，補選最終由泛民嘅唯一代表、工黨秘書長郭永健漁人得利勝出。建制泛民陣營賽後檢討，均認為今次補選結果有喜有憂。對勝選嘅泛民嚟講，今次佢哋政治明星盡出，谷到行晒亦僅得約三成八選票，如果年底區議會換屆選舉同明年立法會選舉，都只得呢啲票數就大鑊。對建制派嚟講，補選結果再次印證佢哋經常都係輸畀自己，而唔係輸畀對手，修補喺政改「甩轆」事件後破裂嘅內部關係，加倍做好選舉協調工作，成為建制派喺未來一年多嘅首要任務。
高投票率利泛民非必然
郭永健宣布當選後，工黨主席兼立法會議員李卓人隨即揚言，補選結果反映選民支持泛民否決政改方案。不過睇真啲，郭永健雖然係贏咗，但只取得近一千四百票，佔總有效票約三成八。反觀兩名聲稱獨立、但係人都知有建制背景嘅對手何萬傑同羅曉楓，合計就有成二千二百幾票。若非兩人互相搶票，而且啱啱好搶到每人各得約一千一百票，泛民根本無可能執到死雞。
有非工黨嘅泛民人士更指出，今次補選各泛民黨派嘅政治明星都有輪流出動拉票，結果成功將投票率推高至逾四成二，顯著高於一般嘅區議會補選，但最終郭永健得票仍然唔到四成，再次證明高投票率有利泛民之說已經唔存在。如果李卓人講得啱，呢三成八選民就代表咗支持否決政改嘅市民比例，泛民喺嚟緊兩場選舉就死得！
建制新東補選協調未掂
建制派方面，雖然今次因為協調失敗而輸掉補選，但一來呢個議席只有不足半年任期，食之無味，二來兩名疑似建制派候選人加起嚟有逾二千二百票，比該區原區議員、因欺詐罪成而喪失議席嘅羅舜泉，喺一一年區選取得嘅約二千一百票仲要多，因此喺數字上該區仲係建制派陣地，未有因欺詐醜聞或內訌問題而完全失守。只要各建制黨派與地區人士，喺未來幾個月修好協調出單一人選，要攞番呢個位應該冇乜難度。
不過，呢個亦正正係建制派嘅最大問題，喺早前嘅政改「甩轆」同之後嘅WhatsApp外洩風波，建制派有幾團結，大家都睇到。建制派就年底區選仲有多個選區未協調好，因湯家驊辭職而引發嘅立法會新界東補選，亦有多個建制派聲言要派人參戰，唔似泛民咁好快就協調出公民黨楊岳橋一人參選。如果各大建制政團未能吸取今次補選嘅教訓，繼續互不相讓，新東議席估計又會拱手讓予泛民。