中環出更：李明逵自爆被鬧龜狗豬
警民關係於去年佔領行動期間受到衝擊，前線警務人員更受到唔少批評責難，身為警隊前「一哥」嘅李明逵自爆，在任警隊時曾畀人鬧過「烏龜、黃皮狗、白皮豬」，又話即使社會對警察一定有意見，甚至有人話前線警務人員係「黑警」，惟一個成熟、有智慧嘅人係唔會畀呢啲說話影響。佢並指，佔領行動期間聽到唔少人支持警隊，強調最重要係警隊可維持專業責任，遇有重大事件及危機是否可以處理。
已退下火線八年嘅李明逵話，依家每周會抽兩日打波、游水，平日親自烹調喜歡嘅餸菜，閒時會返母校中文大學新亞書院教授師弟妹領導才能，而佢最放唔低係培育青少年嘅工作。
籲勿政治化青年軍成立
事有湊巧，香港青少年軍總會今年初成立，由於有解放軍駐港部隊代表做榮譽贊助人，外界一度擔心總會會否向青少年「洗腦」。身為總會諮議會成員嘅李明逵重申，唔應該將事件政治化，又話社會只係多一個制服團體，讓青少年接受軍旅式培訓，學習自強、自信同自律，跟其他青少年活動其實冇分別，據知今個暑假過後將會展開招募。
卓妮