中環出更：莫樹錦講「遺願」 粉絲嚇呆
中文大學臨床腫瘤學系教授莫樹錦（Tony）衣着打扮入時，又識飲識食，不過呢位名醫尋日喺書展講座上，竟然宣布自己患上肺癌，講到「臨死」心願，嚇到台下粉絲呆咗，細問之下原來虛驚一場，呢個消息原來只係「教材」。
鍾意寫作嘅Tony今年再度出書，尋日Gel行個頭現身講座，粉絲爭住搵佢拎簽名。當大家戥佢開心時，Tony公開話自己有絕症，一度七情上面，神情嚴肅話：「我經常問自己，如果有日患上癌症，我會點？」佢直言早有心理準備，癌魔說來便來，「就算我今日冇患癌，明天或者幾年後，都可以有肺癌」，所以一旦真係中招，佢話會第一時間公告天下，大宴親朋，將家中美酒傾巢而出盡興，事關反正都要死，仲怕乜鬼膽固醇。
勉病患笑抗病魔
Tony又提到，臨死前最想做嘅事，係想辦法為正在加國留學嘅兒子置業，又會為女兒未來婚禮寫好一封致詞信，並稱好想一邊做腳底按摩，一邊睇笑片，安祥地離世。Tony放開禁忌「講死」，無非想話畀大家知，即使強壯如醫生，都有機會與癌魔搏鬥，鼓勵患者勇敢樂觀地抗病，笑迎挑戰。
EQ宣揚保育南極
另一方面，立法會議員葛珮帆（EQ）同一個本土品牌嘅創作總監麥雅端（Prudence）一齊出兒童故事書，宣揚保育南極生態。Prudence坦言出故事書比想像中難，既要諗故事大綱，又要顧及教學趣味，修改無數次才完工，相比之下，畫商品公仔一晚便起貨，簡單好多。至於呢頭出完書嘅EQ，轉頭就會起程去非洲坦桑尼亞兩星期，考察環保組織如何拯救遭非法獵殺嘅大象。
卓妮