中環出更：黃成智脫鴿 「東」山再起
民主黨（白鴿黨）黃成智尋日開記者會回應被黨中委會通過革除黨席，佢呢頭話個黨革除佢黨席難以置信，但嗰頭就話已經決定會同志同道合嘅朋友成立新組織平台，仲明言會參與唔同嘅選舉，甚至不排除參加嚟緊嘅立法會新界東補選添！如果成智唔係被革扯，莫講話新界東補選，今、明兩年區議會及立法會選舉都唔擔保佢有份參選，依家白鴿黨畀個機會佢另起爐灶，話唔定成智先至係求仁得仁。
質疑乳鴿唔念舊情
尋日成智帶埋太太同囝囝黃文軒出席記者會，仲有一直撐佢嘅前黨友狄志遠（Dick）都有撐場。成智話，自己曾經幫過唔少乳鴿上位，讓路畀其他黨友參與選舉，甚至放棄連任嘅機會，但最後得到咁嘅結果，覺得好難過，又質疑班乳鴿唔念佢嘅貢獻，係感情用事。而阿Dick仲鬧爆白鴿黨無民主，中委會嘅決定係集體政治謀殺，不仁不義。
至於新平台幾時成立，成智話依家同十幾個朋友傾緊，當中有前任或現任區議員，亦有白鴿黨成員。阿Dick就話同成智好多嘢都好啱feel，但總之一切言之尚早。黃太同文軒都係白鴿黨黨員，被問到會否退黨，文軒就話未係時候，雖然爸爸被踢走，但都尊重中委會決定。至於會否從政，仲喺加州讀書嘅文軒就話見到爸爸搞成咁，香港又立立亂，都想留喺加州發展喎。
卓妮