政府尋日宣布委任安老事務委員會七名新成員，當中有唔少年輕新面孔，包括行政會議成員林健鋒兒子林凱章（Victor）。Victor已經接手打理家族玩具生意，本身亦係方便營商諮詢委員會、紀律人員薪俸及服務條件常務委員會成員，未知佢嘅加入會否為安老事務委員會帶來新氣象呢？
除咗Victor，新成員包括馬會慈善及社區事務執行總監張亮、明愛醫院行政總監謝文華、房協行政總裁兼執行總幹事黃傑龍、港大社會工作及社會行政學系首席講師楊家正等。安老事務委員會主席陳章明、副主席林正財；陳呂令意、陳曼琪、謝偉鴻及董秀英等七名現任成員就再獲委任。任命會喺本月三十日開始生效，任期兩年。
有新成員加入，自然有成員退落嚟，包括保良局前主席鄭錦鐘、房協總經理張滿華等。香港人口逐漸老化，加上早前揭發有護老院涉嫌虐待長者，相信嚟緊會愈來愈多人會關注長者問題喇。