政情：邱副狂來電 宇人「不便」
立法會財務委員會馬拉松式會議踏入第四日，議員每日開會六小時，已經大呻辛苦，不過最慘都算係財委會主席張宇人（Tommy）喇！我哋連日觀察，Tommy每日只可以趁財委會表決鐘響期間的五分鐘先可以去洗手間，其餘時間要乖乖安坐主席位聽實議員官員輪流發言，但點知完會後都要受官員電話疲勞轟炸。
話說Tommy身兼房屋委員會委員，完咗財委會仲要處理近日愈鬧愈大嘅「鉛水風波」。Tommy話，近日運輸及房屋局副局長邱誠武（邱副）一日打幾十次電話畀佢，希望同佢討論鉛水事件，但因為Tommy長時間開會所以無接到。
「唔想佢聽到咚咚聲」
估唔到，邱副竟然鍥而不捨，要求Tommy趁去廁所時同佢傾一傾，Tommy梗係斷言拒絕啦，「我唔想畀佢聽到我去廁所啲『咚咚咚咚』聲呀，之後我就鬧到佢無再打畀我喇！」
原來Tommy曾經喺房委會會議提出成立鉛水調查小組，委任大法官領導，話口未完，特首梁振英尋日就宣布成立獨立調查委員會，唔知今次Tommy算唔算成功爭取呢？