政情：懶理禍水 高官放假
啟晴邨被揭發食水含鉛量超標，之後多個屋邨亦被陸續發現食水含鉛。「鉛水」風波愈鬧愈大，牽連愈來愈廣，但多名政策局官員就懶理「鉛水」風波，安心大踏步放暑假去。根據憲報，發展局局長陳茂波、環境局局長黃錦星、商務及經濟發展局局長蘇錦樑（Greg蘇）及政府新聞處處長聶德權（Patrick）下周起就會齊齊休假，其中Greg蘇同Patrick更加放假超過半個月，認真梳乎。
運輸及房屋局局長張炳良、陳茂波等官員尋日一齊就「鉛水」事件見傳媒，仲話要成立獨立委員會調查事件。喺政府急急諗辦法拆彈之際，陳茂波就喺下周二起休假一星期，期間就要由發展局副局長馬紹祥兼任局長一職。無獨有偶，Greg蘇亦都喺下周二起放假一周，唔知仲以為Greg蘇同陳茂波孖住去旅行。不過，Greg蘇就再識歎啲，因為佢放完一個星期假之後，返一日工又再放十日大假喇，真係難為副局長梁敬國兼任咁耐局長工作。
其實張炳良出任局長以來，一向都慣咗八月放假，但今年就未有放假安排，據聞係因為佢想睇吓「鉛水」事件嘅發展先再作決定喎。張炳良唔敢放假，可能陳茂波都見鉛水風波勢色唔對，其新聞秘書話佢會再考慮係咪放大假喎。
政府管理層下周「半真空」
除咗陳茂波同Greg蘇，黃錦星下周三起亦都會休假九日，期間由環境局副局長陸恭蕙兼任局長。而Patrick亦都喺下周三起放大假，放到下月十一日先復工，足足放假二十一日，期間就由新聞處副處長梁文滔兼任埋處長職務。除咗休假四位局長同官員，政制及內地事務局局長譚志源、政務司司長林鄭月娥及財政司司長曾俊華都會喺下周先後離港公幹。屆時政府最高層可以話係處於半真空狀態，真係辛苦晒署任嘅官員喇。