中環出更：青年基金拒「尷尬」行業惹議
立法會民政事務委員會尋日開會，討論施政報告提出設立三億元嘅青年發展基金，資助創新青年活動，包括以資金配對形式及與非政府機構合作，支持青年人創業，但建議某啲或會令政府尷尬嘅行業，例如煙草就唔應該支持。議員陳家洛就話，當局要界定邊啲係令政府尷尬嘅行業，例如有青年人製作惡搞政府官員、甚至國家領導人嘅應用程式，好多人鍾意下載，又賺到錢嘅話，質疑會否申請唔到撥款。
民政署：常識判斷
民政事務局署理常任秘書長羅志康就話，尷尬係以常識判斷，青年創業嘅計劃會交畀非政府機構審核，計劃如果涉及煙草、賭博、鼓吹暴力、恐怖主義、色情、意識不良、歧視或非法活動，就唔會獲批，但係就唔會涉及政治審查。
建制派議員葉國謙話，如果呢啲創意計劃係惡搞中央或特區政府，佢會否決。佢認為基金應該支持正面嘅計劃，要有「正氣」，質疑教壞青年、教壞啲細路掟野，係咪正面嘅創意？委員會最後都通過呢項撥款建議。
卓妮